• Joel Rois, que mellorou nun segundo a súa marca, vai na posición 48 e ambos esperan mellorar posicións na combinada de mañá.

Lugo, 16 de agosto de 2012. Aroa Freije e Joel Rois fixeron unha moi boa actuación na proba de natación no  Campionato de Europa Cadete de Péntatlon, que se está a disputar en Varsovia (Polonia). Aroa igualou a súa mellor marca (2´18) e vai 14ª empatada coa 13ª clasificada, mentres que Joel mellorou nun segundo a súa marca (2´17) e ocupa a posición 48. Ambos confían en escalar posicións na clasificación na xornada de mañá, xa que disputan a combinada, onde teñen moi bo rendemento normalmente.

No día de hoxe, Aroa Freije, campioa de España, fixo un tempo de 2.18 na natación e logrou igualar a súa mellor marca. Mañá sairá a 24 segundos da primeira clasificada, que é a polaca Maja Klich. Aroa está situada actualmente na decimocuarta posición, empatada coa 13ª. Na segunda posición está Valeria Zhananova (Ucraína), mentres que terceira é Olena Mararovets (Ucraína).

Na combinada Aroa espera mellorar a súa posición, xa que é moi boa tiradora e unha gran atleta. A principal dificultade é que por vez primeira utilizarán láser no tiro, aínda que estiveron practicando estas últimas semanas para adaptarse a esta novidade.

Na proba masculina, Joel Rois fixo un tempo de 2´17 e mellorou nun segundo a súa mellor marca. Actualmente ocupa a posición 48 e sairá a 57 segundos do primeiro clasificado (Henry Choong, de Gran Bretaña). O segundo clasificado é Gabriel Cianelli (Italia), mentres que na terceira posición se atopa Anton Kunznestov (Ucraína). Joel confía en remontar no combinada, xa que é a disciplina que mellor se le da.