• Tres ouros e catro pratas na proba disputada en Sant Boi de Llobregat.

Lugo, 25 de febreiro de 2012. A selección galega acadou sete medallas (tres ouros e catro pratas) na primeira proba do Campionato de España de Pentatlón Moderno por autonomías, disputada hoxe en Sant Boi de Llobregat. Con este resultado, Galicia ocupa a segunda posición provisional na xeral por detrás de Catalunya.

Foi o primeiro enfrontamento da tempada e Galicia logrou un magnífico resultado, e iso a pesar de acudir un equipo bastante curto  de doce deportistas, por dúas baixas de última hora. Aínda así, as e os deportistas galegos amosaron ás súas gañas de seguir medrando.

Desta forma, na categoría benxamín masculina, Esteban Basanta logrou a medalla de prata, mesmo metal que acadou Martín Freije en alevín masculino.  Pero houbo máis. En infantil feminino Lúa Vidal logrou a medalla de ouro e tamén foi primeira Aroa Freije que, a pesar de ser infantil por idade, competiu en cadete feminino e foi a mellor.

E na categoría cadete masculino houbo dobrete, co ouro de Raúl Blanco e a prata de Joel Rois. E por último, destacar a medalla de prata de Eva Basanta (que está adestrando no Centro de Alto Rendemento de Sant Cugat) na categoría xuvenil feminina.

O campionato de España por autonomías de pentatlón –nas categorías de benxamín, alevín, infantil, cadete e xuvenil- está formado por tres probas, das cales a segunda celebrarase en Lugo o próximo día 24 de marzo. Nas categorías benxamín, alevín e infantil as e os deportistas realizan somentes as probas de combinada (carreira e tiro) e natación, mentres que en cadete e xuvenil tamén compiten en  esgrima. A proba de hípica só se realiza nas categorías superiores (júnior e absoluto), que non están incluídas neste campionato.