• O galego foi o primeiro español na proba, mentres que Jesús Gomar e Uxío Abuín foron 16 e 17.

Lugo, 10 de xuño de 2012. Óscar Vicente foi o décimo clasificado na Copa de Europa Sprint de Cretona (Italia), que se celebrou hoxe, e logrou desta forma importantes puntos para o ranking ITU. E non foi o único, xa que Jesús Gomar e Uxío Abuín tamén remataron entre os vinte primeiros: Jesús foi o 16º e Uxío 17º. Na categoría feminina o papel das galegas foi máis discreto, ao non rematar entre as vinte primeiras.

Na proba masculina, Óscar Vicente foi de menos a máis para rematar nun meritorio décimo posto, sendo o primeiro español cun tempo de 56:13. O galego comezou bastante mal no segmento de natación, a máis dun minuto dos primeiros clasificados, pero a partir de aí comezou unha remontada espectacular. Xa fixo unha boa bicicleta (entre os quince mellores) e foi o mellor no segmento de carreira a pe, o que lle permitiu rematar a proba na décima posición.

Tamén temos que destacar o 16º posto de Jesús Gomar (56:46) e o 17º de Uxío Abuín (56:49), que tamén lograron puntos para a clasificación ITU. Ademais era unha proba de alto nivel, con importantes deportistas loitando pola vitoria. O gañador da Copa de Europa de Cretona foi o británico Thomas Bishop (54:58), mentres que segundo foi o ruso Igor Polyanskiy (55:27).

Na categoría feminina as cousas non foron tan positivas para as galegas, xa que non lograron rematar entre as vinte primeiras. Estefanía Domínguez chegou na posición 24, cun tempo de 1:04:48 e Melina Alonso foi 36ª (1:07:13). A vencedora da Copa de Europa foi Lois Rosindale (Gran Bretaña) cun tempo de 1:02:09.

Tríatlon de Zarautz. Pola súa banda, Saleta Castro foi cuarta no Tríatlon de Media Distancia de Zarautz, que se disputou onte na localidade vasca. A galega, que viña de disputar o Ironmán de Lanzarote, non se atopou ben en ningún momento, xa que ambas probas estaban excesivamente cerca e acumulaba moito cansanzo. Así, a pesar de que rematou o tríatlon as sensacións sempre foron malas e sen posibilidades de atacar ás que ían por diante. A gañadora foi Maider Gaztadga cun tempo de 4:37:12, mentres que Saleta fixo un tempo de 4:54:55. Agora, a deportista galega vai descansar durante uns días.
 
Na categoría masculina gañou o gran favorito, Eneko Llanos, cun tempo de 3:547:02. O galego Javichín Pérez rematou na posición 98 (4:48:23), mentres que Omar González (adestrador de Javi Gómez Noya) chegou na posición 349 cun tempo de 5:23:29. Esta proba é un referente no calendario e a edición deste ano tivo unha participación superior aos 600 deportistas.